Institutu d'Investigación ya Innovación Educativa (INIE)

La Sociedá de güei carauterízase pol calter complexu, interdependiente, dinámicu ya informacional nel que concursen persones físiques (individuos) y persones xurídiques (empreses, instituciones, asociaciones, fundaciones..) que s’inxerten nun mediu ambiente políticu, social, económicu, ecolóxicu, físico-finitu y con recursos llendaos.

Nesti contestu van afitándose temporalmente y de mou interdependiente macrotendencies estremaes, casu de la glocalización y el desendolcu científico-teunolóxicu, qu’aceleren los procesos de manera esponencial en tolos ámbitos, lo que fai surdir nuevos modelos económicos, políticos y sociales qu’obliguen a les persones a una adautación permanente de les sos competencies, necesaries pa torgar que se xeneren polarizaciones, esclusiones y fiendes d’alfabetización insalvables.

L’accesu xeneralizáu a la teunoloxía y a la información impón anovamientos sistémicos qu’afeuten a les competencies de les persones (saber, saber ser y saber facer) seyan físiques o xurídiques. Nesti contestu, l’usu de plataformes intensives, accesibles, versátiles y de costu baxu algamen progresivamente mayor relevancia pol valor amestáu que xeneren a los procesos. Más de la metá del alumnáu exercerá profesiones y mandarán-yos a les ferramientes qu’entá nun se crearon, polo que los currículums, los sistemes de deprendimientu y los modelos d’evaluación y certificación de competencies, de la manera que los conocemos, han evolucionar.

La cercana rellación que s’afitó nel tiempu ente Sociedá y Educación fai necesario que les persones qu’alministren lo educativo tomen determinos y actúen pa disponer axustes cuando se producen desequilibrios ente una y otra. Poro, nuna Sociedá de la Información, en cambéu permanente como resultancia de la mundialización, el desendolcu teunolóxicu, la competencia internacional, la evolución de los mercaos y los desafíos medioambientales y políticos tresnacionales, qu’aspire a convertise nuna Sociedá del Conocimientu Sostenible y Responsable, lo Educativo llogra mayor relevancia.

Les universidaes que foron nos últimos sieglos llugares de xeneración y de tresmisión de conocencia han entender, aceutar y adautase al contestu que surde y antemanar situaciones futures. Si nun quieren que les sos misiones queden condergaes a la irrelevancia, desplazaes como axentes y referentes educativos nes sociedaes venideres, habrá apostase por un currículum afitáu en nuevos principios guiaos por 3 R: Rigor (aptitúes y capacidaes adquiríes como resultancia del so deprendimientu), Relevancia (comprensión de la conexón del so deprendimientu colos retos del mundu de güei y col so llabor futuru) y Respetu (promoción de rellaciones respetuoses ente los axentes educativos implicaos que fomenten les aptitúes académiques).

La Formación, la Investigación y l’Innovación Educativa sedrán tres referentes imprescindibles nes instituciones d’Educación Superior pal desendolcu y l’adautación de les persones físiques y xurídiques a esti rodiu dinámicu.