Inicio » Presentación

Presentación

En nome de tol personal que conforma esta Estaya, doi-y la mio bienllegada candial al Institutu d’Investigación ya Innovación Educativa (INIE) de la Universidá d’Uviéu.

L’INIE preséntase a la comunidá universitaria y a la sociedá como un Ecosistema d’Investigación, de Formación y d’Innovación Educativa con calter tresversal, interdisciplinar ya interinstitucional. L’espaciu virtual nel que s’atopa ta diseñáu pa trabayar estos aspeutos ensin escaecer la tresferencia y l’espardimientu de la información, rescamplando la edición de la Revista científica "Aula Abierta".

Dientro del Equipu de Gobiernu de la Universidá, l’INIE depende del Vicerrectoráu d’Investigación, y el so cometíu ye contribuyir a la meyora de la calidá del enseñu al traviés del perfeicionamientu metodolóxicu y didáuticu del profesoráu. Pa ello dende l’INIE quierse, per un llau, dar respuesta a les demandes formatives de los distintos Departamentos, Facultaes, Centros y Servicios de la Universidá d’Uviéu y, per otru, promover la participación activa y la tresferencia de conocencia que se fai en materia d’investigación ya innovación educativa ente los estremaos equipos y grupos d’investigación dientro y fuera de la nuesa institución, contribuyendo dende la so misión y aición al desendolcu de la responsabilidá social universitaria.

L’INIE quier integrar les cultures académica, empresarial, política y social-ciudadana pa dar respuesta a les demandes que van surdiendo nel procesu de converxencia y construcción del Espaciu Européu d’Educación Superior; la meyora de la Educación dende la Innovación; la xeneración de conocencia dende la Investigación y la xestión del cambéu dende la Meyora continua. La xera ye complexa, polo que la so aplicación real namás sedrá posible si se trabaya como un procesu de deprendimientu continuu y mutuu onde toles persones tienen de collaborar. Pal llogru d’esti oxetivu, l’Institutu d’Investigación ya Innovación Educativa construyirá la so visión dende la participación, el compromisu y la inclusión pal desendolcu, la estensión y l’arranque d’aiciones pa deprender a deprender, deprender a collaborar, deprender a entamar y deprender a aceutar el cambéu.

Convidámoslu a consultar los distintos apartaos de la web y a compartir les sos propuestes, intereses y esmoliciones contautando col INIE.

Gracies pol so tiempu.

Un saludu candial, Emilio Álvarez Arregui.

Direutor del Institutu d’Investigación ya Innovación Educativa (INIE).

 

Enllaces rápidos